पहिरोको त्रासका कारण ३ घर परिवार विस्थापित

• पहिरोको त्रासका कारण खोटाङको दिक्तेल रुपाकोट मझुवागढी नगरपालिका–१२ जालपा सावालुङका ३ परिवार बास सार्न वाध्य बनेका छन् ।

गत शुक्रबार राती परेको भारी वर्षाका कारण गाउँ चिरा–चिरा परेपछि सावालुङका जीतबहादुर राई, रामहिरा राई र कर्णबहादुर राईको परिवार रातका समयमा बास सार्न वाध्य बनेका हुन् । गाउँभरी धाँजा फाटेर पहिरो गएर बगाउने खतरा भएपछि विस्थापित परिवारलाई हुर्लुङ–जालपा–फेदी सडक छेउमा खेतमा प्लाष्टिक टनेल टाँगेर अस्थायी बसोबासको व्यवस्था मिलाइएको छ ।

घर माथीबाट झरेको पहीरो

वडा कार्यालय र टोल विकास संस्थाको पहलमा विस्थापितलाई शनिबारदेखि अस्थायी बसोबासको व्यवस्था मिलाइएको हो । विस्थापित परिवार बेलुका टहरामा बास बसेर बिहान घर फर्कने गरेका छन् । बेलुकाको खाना घरमा तयार पारेर अस्थायी डेरामै लगेर खाएर सुत्ने गरेका छन् । खेतको ग¥हाको बास हुँदा बुढापाका र बालबालिकाको स्वास्थ्यमा समस्या देखिन थालेको छ ।
सावालुङका भीमबहादुर राईको परिवार पनि विस्थापित भएका छन् । तर अर्को गाउँमा भूकम्पीय पुःननिर्माण अन्तरगतको घर बनाएका उनी नयाँ घरमा सरेर बसिरहेका छन् । वर्षाका कारण जालपा घलेगाउँका धनबहादुर बिक, चावालुङका शारदा राई र खरबारीका सउधन राईको परिवार विस्थापित छन् । सावालुङ पुछारमा कमेरे माटो भएकाले भारी वर्षा हुँदा स्थानीय जहिल्यै पहिरोको त्रासमा बस्न बाध्य छन् ।

एक घर र गोठका बस्तु समेत पुरेको पहीरो हौंचुर

जमिन चिरा पर्न थालेपछि चार वर्षअघि सावालुङका स्थानीयलाई केही हप्ता विद्यालयमा सारिएको थियो । पहिरोको त्रासका कारण बिस्थापितको उद्धार तथा राहतका लागि पहल गरिने मेयर तीर्थराज भट्टराईले बताए । यस्तै रावाबेँसी गाउँपालिका–६ हौंचुर डाँडागाउँका ११ परिवार पहिरोको जोखिममा परेको छ । पहिरो खसेपछि सोभन्दा मुनिका भैरबहादुर राई, उद्योगबहादुर भुजेल, केस्नबहादुर राई, धनकुमार राई, बर्णबहादुर राई, पत्थरबहादुर राई, हरि राई, प्रदीप राई र पर्शुराम राईको घर जोखिममा परेको हो । यस्तै पहिरोभन्दा माथिका शुक्रराज राई, चित्रबहादुर खत्री र डिल्लीबहादुर राउतको घर जोखिममा परेको हो । सडक मर्मतका क्रममा डिलमा थुपारिएको माटोका कारण पहिरो गएको हो । पहिरोका कारण हौंचुर डाँडागाउँका बलबहादुर खत्रीको घर बगाएको थियो । यस्तै, भैरबहादुरको पाडो र बहर गोरु पुरेको थियो ।