रामेछापमा यात्रुवाहक बस तामाकोशीमा खस्यो : ९ जनाको मृत्यु, ८ घाइते

रामेछापमा यात्रुवाहक बस तामाकोशीमा खस्यो : ९ जनाको मृत्यु, ८ घाइते
रामेछाप, २७ माघ — काठमाडौँबाट मन्थली हुँदै ओखलढुङ्गा जाँदै गरेको यात्रुवाहक बस रामेछापको मन्थली नगरपालिका–६ भलुवाजोरस्थित लिलौटी क्षेत्रमा दुर्घटनामा परेको छ। सुनकोशी–तामाकोशी संगमस्थल त्रिवेणी मन्दिर नजिकै बस सडकबाट तामाकोशी नदीमा खस्दा ठूलो मानवीय क्षति भएको हो।

दुर्घटना ग्रस्त बस

दुर्घटनामा बसधनी कुमार बस्नेतसहित हालसम्म ९ जनाको मृत्यु भएको आशंका गरिएको छ भने ८ जना घाइते भएका छन्। मृतकहरूमध्ये धेरैको सनाखत हुन बाँकी रहेको प्रहरीले जनाएको छ।
घाइतेमध्ये ७ जनाको खुर्कोटस्थित शुभजीवन अस्पताल र १ जनाको मन्थली अस्पतालमा उपचार भइरहेको छ। केही यात्रु घटनास्थलमै मृत अवस्थामा फेला परेका थिए।
प्रारम्भिक अनुसन्धानअनुसार सिधा बाटोमा तीव्र गतिका कारण दुर्घटना भएको आशंका गरिएको छ। सेलेघाटस्थित ट्राफिक प्रहरीको अभिलेखअनुसार बसमा १३ जना यात्रु सवार रहेको इन्ट्री भए पनि वास्तविक यात्रु संख्या अझै यकिन हुन सकेको छैन। बीच बाटोबाट यात्रु चढाइएको हुन सक्ने आशंका गरिएको छ।

रामेछापमा यात्रुवाहक बस तामाकोशीमा खस्यो : ९ जनाको मृत्यु, ८ घाइते

दुर्घटनापछि नेपाली सेना, नेपाल प्रहरी र सशस्त्र प्रहरीको संयुक्त प्रयासमा दुईवटा जेसिबी प्रयोग गरी नदीमा खसेको बस बाहिर निकालिएको छ। दुर्घटनाग्रस्त बस हाल खाँडादेवी गाउँपालिका क्षेत्रतर्फ तामाकोशी किनारमा राखिएको छ।
घटनास्थल पुगेका मृतकका आफन्तहरूले चालकको लापरबाहीका कारण दुर्घटना भएको आरोप लगाउँदै आक्रोश व्यक्त गरेका छन्। दुर्घटनाले रामेछाप र ओखलढुङ्गा जिल्लालाई शोकमा डुबाएको छ।