४०० वर्षपछि मन्दिरमा पानी पुग्यो

खोटाङको प्रसिद्ध धार्मिक स्थल मझुवाकालिका भगवती मन्दिरमा ४०० वर्षपछि पानी पुगेको छ । दिक्तेल रुपाकोट मझुवागढी नगरपालिका ५ स्थित उक्त मन्दिरमा पहिलो पटक २१ किलोमिटर टाढा दुरीबाट पानी पुर्‍याइएको हो । खानेपानी सव–डिभिजन कार्यालय खोटाङले आर्थिक वर्ष २०७२/०७३ मा सुरु गरेको हो ।

कालिका भगवती मन्दिर

चालु आर्थिक वर्षमा सव–डिभिजन कार्यालयले २० लाख बजेट विनियोजन गरेसँगै मन्दिर परिसरममा पुर्‍याउन सफल भएको उपभोक्ता समितिका अध्यक्ष दुर्गा प्रसाद घिमिरेले बताउँनुभयो । मन्दिर परिसरमा धार्मिक मान्यता अनुसार नौ धारा निर्माण गर्ने योजना रहेको मन्दिर व्यवस्थापन समितिले जनाएको छ ।

दिक्तेल रुपाकोट मझुवागढी नगरपालिका ३ मुडे स्थित दिखुवा सिरको लोचाबाट पाइप मार्फत दिक्तेल रुपाकोट मझुवागढी नगरपालिकाको ५ कालिका भगवती देविस्थान मन्दिर सम्म पानी पुर्‍याइएको उपभोक्ता समितिका अध्यक्ष घिमिरेले जानकारी दिनुभयो ।

जिल्ला सदरमुकाम दिक्तेलबाट करिब १ किलोमिटरको दुरीमा अवस्थित मन्दिरमा यस अघि मानिसहरुले  घरबाटै बोकेर जानुपर्ने बाध्यता थियो  । मन्दिरमा पानी पुगेपछि मन्दिर सरसफाइ तथा अन्य नृत्यकर्मका लागि पानी बोक्नुपर्ने बाध्यता हटेको पुजारीहरु बताउँछन् ।