खोटाङका दुई पत्रकारलाई राष्ट्रिय दलित पत्रकार संघको सम्मान

खोटाङ, १ असोज । राष्ट्रिय दलित पत्रकार संघ, नेपाल खोटाङ शाखाले दुई पत्रकारलाई सम्मान गरेको छ । दोश्रो जिल्ला अधिबेसन उद्घाटन–सत्रको अवसर पारेर संघले मंगलबार पत्रकार राजन ठटाल र कृष्णकला राईलाई जनही दुई हजार पाँच सयसहित सम्मान गरेको हो । पत्रकारिताको माध्यमबाट समाज परिवर्तन एवं दलित शसक्तीकरणको क्षेत्रमा कलम चलाएर समतामुलक समाज निर्माणका लागि महत्वपूर्ण योगदान पुर्‍याएको भन्दै संघले पत्रकार ठटाललाई सम्मान गरेको हो ।
यस्तै, पत्रकारिताको माध्यमबाट समाज परिवर्तन र महिला शसक्तीकरणको क्षेत्रमा कलम चलाएर समतामुलक समाज निर्माणका लागि योगदान पुर्‍याएको भन्दै पत्रकार राईलाई सम्मान गरिएको राष्ट्रिय दलित पत्रकार संघ, नेपाल खोटाङका अध्यक्ष सविना अछामेले बताईन् ।
पत्रकारद्धयलाई प्रमुख अतिथिका रुपमा संघका प्रदेश उपाध्यक्ष गंगा बिश्वकर्मा, नेपाल पत्रकार महासंघ शाखा खोटाङका अध्यक्ष दिलीप खत्री र वरिष्ठ पत्रकार कृष्ण आचार्यले नगद र सम्मान–पत्र प्रदान गरेका थिए ।