निजामती सेवा दिवसमा ऐसेलुखर्कका सात कर्मचारी पुरस्कृत

निजामती सेवा दिवसमा ऐसेलुखर्कका सात कर्मचारी पुरस्कृत
खोटाङ, २२ भदौ । निजामती सेवा दिवसको अवसरमा खोटाङको ऐसेलुखर्क गाउँपालिकाले सात जना कर्मचारीलाई पुरस्कृत गरेको छ ।

पुरस्कार बितरण पछि

उत्कृष्ट कार्यसम्पादन गर्ने कर्मचारीलाई छनौट गरेर १९ औं निजामती सेवा दिवसको अवसरमा बुधबार सम्मान गरेको हो । १० हजार ५०० राशीको सर्वोत्कृष्ट निजामती पुरस्कार रामकाजी नेपाललाई र ७ हजार ५५० रुपैयाँ राशीको उत्कृष्ट निजामती पुरस्कार निर्मला  शर्मा,किर्ती बहादुर राई,प्रदिप ढकाल,भक्त बहादुर सुनुवारलाई प्रदान गरिएको छ । ५ हजार राशीको निजामती कर्मचारी पुरस्कार  धनकुमार खत्री, किसन अधिकारीलाई प्रदान गरिएको छ ।
गाउँपालिका अध्यक्ष गिरेन्द्रबहादुर राईले उत्कृष्ट कर्मचारीलाई नगद पुरस्कारका साथमा प्रमाण–पत्र हस्तान्तरण गरेका छन् ।

पालिका प्रमुख गिरेन्द्र बहादुर राई द्वारा पुरस्कार बितरण गरिदै

गाउँपालिकालाई समृद्ध बनाउन सबै तहका कर्मचारीको मनोवल बृद्धिका लागि कार्यसम्पादनका आधारमा उत्कृष्ट कर्मचारीलाई पुरस्कृत गरिएको गाउँपालिका अध्यक्ष राईले बताए ।
निजामती सेवा दिवसकै अवसरमा भीरपानीमा हात्तीबारको बिरुवा रोपिएको छ । निरन्तर पहिरो गइरहने ठाउँलाई छनौट गरेर हात्तीबारका पाँच सय बोट बिरुवा रोपिएको हो । चाँडो बढ्ने, जराले बलियोगरी माटो पक्रने र सुक्खा ठाउँमा पनि बाँच्ने भएकाले पहिरो रोकथाममा टेवा पुर्‍याउने लक्ष्यका साथ हात्तीबार रोपिएको गाउँपालिका अध्यक्ष राईले बताए । दिवसकै अवसरमा गाउँपालिकाको कार्यालय परिषरमा एभोकार्डो फलको बिरुवा रोपिएको छ ।

प्रमुख प्रशासकीय अधिकृत हिराकुमारी यादवको अध्यक्षतामा भएको कार्यक्रममा गाउँपालिका अध्यक्ष राई प्रमुख अतिथि एबं उपाध्यक्ष राजेश राजभण्डारी विशेष अतिथि थिए । कार्यक्रममा ऐसेलुखर्क गाउँपालिका–३ ऐसेलुखर्कका वडाध्यक्ष टेकेन्द्र राजभण्डारी, ऐसेलुखर्क गाउँपालिका–७ माक्पाका वडाध्यक्ष अरुण राई, निजामती कर्मचारी, स्थानीय लगायतको उपस्थिति रहेको थियो ।