स्ववियु निर्वाचनको विषयमा नमूना मतदान गरे अनेरास्ववियुले

खोटाङ । एमाले निकट अनेरास्ववियु खोटाङ स्ववियु निर्वाचनको विषयमा नमूना मतदान गरेको छ ।

लामो समयदेखि हुन नसकेको स्ववियुको निर्वाचनका विषयमा विद्यार्थीको मत सर्भेक्षणका लागि अनेरास्वबियुले दिक्तेल बहुमुखी क्याम्पसमा सोमबार नमूना मतदान गरेको हो ।

स्ववियुको औचित्य र आवश्यकता महसुस गर्दै आयोजना गरिएको नमूना मतदानमा २७८ मत खस्दा २१८ मत स्ववियु निर्वाचनको पक्षमा खसेको छ । यस्तै, स्ववियु निर्वाचनको विपक्षमा ४७ मत खसेको छ । १३ मत बदर भएको अनेरास्ववियु खोटाङका अध्यक्ष मोहन संग्रामले बताए ।
हरेक त्रिभुवन बिश्व विद्यालयमा तत्काल स्ववियु निर्वाचन गर्नुपर्ने पक्षमा दवाव सिर्जना गर्नका लागि अनेरास्वबियुले नमूना मतदान गरेको हो । लामो समयदेखि त्रिवि र मातहतका क्याम्पसमा स्ववियु रिक्त हुँदा क्याम्पसमा स्वेच्छाचारिता बढेको, विद्यार्थी र क्याम्पसबीच पुलको काम गर्ने संयन्त्रको अभावमा विद्यार्थीले समस्या झेल्नु परेकाले तत्काल स्ववियु निर्वाचन हुनुपर्ने अनेरास्ववियुका अध्यक्ष संग्रामले बताए ।

‘लामो समयदेखि स्ववियुको निर्वाचन हुन सकेको छैन । स्ववियु नहुँदा क्याम्पस स्वेच्छाचारी बन्दै गएको छ । विद्यार्थी र क्याम्पसबिच पुलको अभाव छ । विद्यार्थीले थुप्रै अप्ठ्यारा खेप्न परिरहेको छ । कतिपय विद्यार्थीलाई स्ववियुको बारेमा जानकारी नै छैन,’ अध्यक्ष संग्रामले भने, ‘स्ववियु निर्वाचन नभएका कारण ग्रामिण भेगका कति विद्यार्थीले अप्ठ्यारो खेपिरहेका रहेछन् कति विद्यार्थीले स्ववियु निर्वाचन चाहन्छन् भन्ने तथ्यांक निकालेर त्रिबि र अन्य निकायमा पठाउन मत सर्भेक्षण गरिएको हो ।’

बालिग मताधिकार प्राप्त विद्यार्थीलाई आसन्न स्थानीय तह, प्रदेश र संघीय संसदको निर्वाचन तथा स्ववियु निर्वाचनमा मत हाल्ने अभ्यासका रुपमा समेत नमूना मतदान आयोजना गरिएको अनेरास्ववियुले जनाएको छ ।